نْحِبِّكْ عَلَى رُغْمِ الزَّمَانْ وجورَهْ

نْحِبِّكْ عَلَى رُغْمِ الزَّمَانْ وجورَهْ
وِمْحَايْنَهْ وشْرُورَهْ
عْشَقتِكْ جعلتِكْ في الهَوى أُسْطورَهْ
*****
نْحِبِّكْ عَلَى رُغْمِ الزَّمَانْ وضيمَهْ
وِمْحَايْنَهْ وتحطيمَهْ
عْشَقتِكْ جعلتْ الْحُبْ قصَّةْ عظيمَهْ
إِنْتِ غَرامْ الـقَلِبْ ديـمَا ديـمَهْ
وِاِنْتِ ضِياهْ ونورَهْ
ولا ثَم ْمثل هْواك في الــمَعمورَهْ
****
نْحِبِّكْ عَلَى رُغْمِ الزَّمَانْ وشرَّهْ
ورُغْمِ الـسِّنين الْمُرَّهْ
سْوَى الدَّهرْ يكوي الـقَلِبْ ولا يسُرَّهْ
إِنْتِ الهوى والْحُبْ وِاِنْتِ الحُرَّهْ
لْمَا تهاب مِنْ سامورَهْ
وأَهْل الغَرام ذْنوبْهم مغفورَهْ
****
نْحِبِّكْ عَلَى رُغْمِ الزَّمَانْ وحيفَهْ
وِمْحَايْنَهْ وتصريفَهْ
هديتك مشـاعر صادقة ونظيفَهْ
إِنْتِ الغَرامْ لْمَا عرفتِشْ كيفَهْ
ولا كتبت مثل سْطورَهْ
خلَّى الـعُيونْ دموعهـا مَحْدورَهْ
****
نْحِبِّكْ عَلَى رُغْمِ الزَّمَانْ وظلْمَهْ
والْحُبْ أَجْمَلْ كلْمَهْ
الْحُبْ نـور يشع وسط الـظلْمَهْ
إِنْتِ غرام الـقَلِبْ وِاِنْتِ حلْمَهْ
لا سْوَاك يُقصُدْ شُورَهْ
لا الـغِيرْ يلفى لا الـغِريبْ يزورَهْ
****
نْحِبِّكْ عَلَى رُغْمِ الزَّمَانْ وعيبَهْ
والْحُبْ قصَّةْ غْريبَهْ
رحلِةْ كِيانِي في مَعاني عجيبَهْ
إِنْتِ وميض الرُّوح وِاِنْتِ الطِّيبَهْ
بـمحبّـتي مخمُورَهْ
وْخَمِرْ الْمَحبَّةْ نازْلَة في السُّورَةْ
****
نْحِبِّكْ عَلَى رُغْمِ الزَّمَانْ وعُسْرَهْ
ورُغْمِ الشِّقَا والحسْرَهْ
والْحُبْ فرحَهْ في سنين الغَصْرَهْ
إِنْتِ الْمَعاني بكلها مختصرَهْ
قلبك رهِيفْ شْعُورَهْ
وحبك شبكني في غِريقْ بْحُورَهْ
*****
نْحِبِّكْ عَلَى رُغْمِ الزَّمَانْ وقمْعَهْ
ورُغْمِ الشقا والدمْعَهْ
والْحُبْ يضوي في مِثيلْ الشمْعَهْ
إِنْتِ الـمعـاني بكلها مجتمْعَهْ
وِاِنْتِ الجنان وحُورَهْ
والعِينْ منِّكْ هايْمَةْ مَسْحورَهْ

نْحِبِّكْ عَلَى رُغْمِ الزَّمَانْ وظنَّهْ
والْحُبْ نارْ وجنَّهْ
الْحُبْ يهديلي القَصيدْ وفنَّهْ
إنْتِ جُنونْ القلب وانت جِنَّهْ
زيدِي الكِنين سْرُورَهْ
خلِّي القُلوبْ الـقاسْيَةْ مَهجورَهْ
****
نْحِبِّكْ عَلَى رُغْمِ الزَّمَانْ وهولَهْ
ولِيلْ البِعادْ وطُولَهْ
والْحُبْ عندي فَرِسْنَةْ وبْطُولَهْ
إِنْتِ الهوى العُشَّاقْ يتـعنُّولَهْ
عـالي عليهم سُورَهْ
ذاقُو الأسَى وقْلوبهم مقهورَهْ
****
نْحِبِّكْ عَلَى رُغْمِ الزَّمَانْ ونارَهْ
ورُغْمِ الـشقا واَمرارَهْ
والْحُبْ بدر اللي سطع باَنوارَهْ
إِنْتِ غرام الـقَلِبْ وِاِنْتِ أسرارَهْ
في غـوامقه مستورَهْ
ويموت وقت لـتخطمي بالدُّورَهْ
****
نْحِبِّكْ عَلَى رُغْمِ الزَّمَانْ وضيقَهْ
وسـوامره وحريقَهْ
والْحُبْ شَمِسْ لْضاويه بحقيقَهْ
مازن كتبت عن الهوى والثِّيقَهْ
وقصـايدي مشهورَهْ
تسـافر على طُول الْمَدى وبْرُورَهْ

*****
نْحِبِّكْ عَلَى رُغْمِ الزَّمَانْ وجورَهْ
وِمْحَايْنَهْ وشْرُورَهْ
عْشَقتِكْ جعلتِكْ في الهَوى أُسْطورَهْ

جوان2006