تغْريبَةْ (نغم مصري) (من ديوان نغم)

أنا اللي قلبي انجرَحْ
والجرح غنَّالِكْ
ولا شُفت لحظِةْ فَرحْ
دمعةْ بـِموَّالِكْ

وانْتِ الخطاوي اتُّوهْ
بين السِّككْ ضاعِتْ
والقلب لوْ سَألوهْ
ليهْ الحَيا باعِتْ
هيقُولْ يا عُمْرِي لْفَاتْ
يا اللِّي انْتِ مِشْ عُمْرِي
يا زَهْر حُبِّي لـْماتْ
والأمرِ مِشْ أمْرِي

دَا إِنْتَ عُمرِ حبيبْ
مِنْ غيرْ أمَلْ سَبْنِي
والعمر لَمَّا يْغيبْ
ظَلْمةْ وضَياعْ يا ابْنِي

يا ابني ويا ابْنِ الرِّيحْ
والخُضْرَة والْمَيَّةْ
والغُصْن لَمَّا يْمِيحْ
يِهْمِس بِحنِّيَّةْ

أَنا أَصْلِي مِسْتَنِّيهْ
يِيجِي وينْصِفْني
والحِلمْ مِتمنِّيهْ
ينْزلِّـي ويشُفْنِي

دا أَنا أَصْلِي كُلِّي بَذُوبْ
مِنْ لَمْسِةْ الهَمْسَةْ
والقلبْ مهْمَا يْتُوبْ
يعشقهَا مِنْ لَمْسَةْ

يا ضحْكِةْ الْمِصباحْ
في ليلِةْ الظَّلمَةْ
ويا فتنةْ التِّفاحْ
في النَّظرة والكِلْمةْ
ويا سكِّةْ التَّايْهينْ
عالجمْرِ رايحنلِكْ
يا بسمة الحِلْوينْ
عالموجة راجنلِكْ

يا بَحر يِهْدي الشَّطْ
مُوجَةْ وَرا الثَّانْيَةْ
يا كِلْمَةْ جُوَّا الخَطْ
نِكتْبهَا في ثَانْيَةْ

ولـَمَّا السِّنينْ بِتْفُوتْ
تِنْسَى كتَبْناها
بَسْ القلوب بِتْمُوتْ
ولا يومْ بِتنْساهَا

سوسة
‏18‏/03‏/2012‏ 02:14:11 ص