مريض ومرضي طوّل بيّا

مريض ومرضي طوّل بيّا

ذوّقني الأمرار
سبب دايا من حب صْبيّة

حرقتني بالنارْ

****

مريض ومرضي بيّا طايلْ

ذوّقني الليعاتْ

سبب دايا من الزين الهايلْ

خلاّنيِ فِتفاتْ

وكي تمشي تبدا تتمايلْ

مركب عالموجاتْ

ساعة فملقاها نتخايلْ

نفرح لَلَّا جاتْ
وساعة على الفرقة نتحايلْ

نتفكّر لي فاتْ

ونرجع والدمعة فعينيَّ

نبكي على اللي صارْ

كي رحلتي ما سألتي عليَّ

ولا ردّك مشوارْ

****

مريض ومرضي في مكنوني

مرض الحب صعيبْ

حبيب إلي ساكن في عيوني

ننسى غرامه عيبْ

نزل دمع على روس جفوني

فوق الخد سكيبْ

نبكي على أحباب لفاتوني

في سامر ولهيبْ

نسوني وقسوني وخلّوني

لا صاحب لا حبيبْ

جفوني لا طلّة لا جَيّة

لا ليل ولا نهارْ

كبدي بفرقتهم مكويّة

ودليلي محتارْ

****

مريض فاني والقلب يلاجي

ضايق بيه البرْ

لا نسيت ولا صبت علاجي

من اللي هواها شرْ

تمكّن في كبدة وجواجي

وسط العظم حْفَرْ

مسيت هايم ضايع منهاجي

شارب كاس المرْ

نراجي فملقاها ونراجي

ولا ملقى لا خبرْ

نزف جرحي من عيون البيّة

هواها عليّ جارْ

وكي ننزف تتشمّت فيَّ

وتهتك لي لَسرارْ

****

مريض فاني من الولف الجافي

هدّتني لجراحْ

أنا سقيته من الود الصّافي

ومن خمرة الأرواحْ

نسي ودي والحضن الدافي

وهزاته لرياحْ

غرّقني وكسّر مجدافي

تعّبني وارتاحْ

خلاني كالجمر الطافي

طفّالي المصباحْ

هيّمني وكتّف لي يديَّ

الي خدوده بُلّارْ

مازن وبلادي المهديّة

اطّاوعني الأشعارْ

سوسة 25-07-2020  / 18:21