ضحضاح (شعر شعبي)

ضحضاحْ يوساع يكساحْ ** رمـال ورياحْ
ويا مصعبه فجْ وبراحْ ** ولا حدْ مِالخلق طاقَهْ
شهيليه للريق شيـَّاحْ ** والغيـم كثاحْ
لفاع واَهوال وأتراحْ ** والذِّيب تسمع عْواقَهْ
لا نَبت لا غُصْن لا مْراحْ ** لافيهشْ أرباحْ
يزراق يغماق ينداحْ ** رقراق دلهس رواقَهْ
لا يقطعه كوت يِمْلاحْ ** عالأرض سباحْ
لا شالخ النَّابْ يُقراحْ ** مزرَّصْ وسايق نْياقَهْ
ضحضاحْ فيه ألف ضحضاحْ ** للطُّوف نزَّاحْ
لا مرير لا طير بجناحْ ** لا نْحَل يرشف أنشاقَهْ
جي دون عمهوج مرجاحْ ** في اللون تسماحْ
نا حزيتها مثيل تفاحْ ** والبعد حرّم مذاقَهْ
مُوضامْ لا صُبُتْ نرتاحْ ** والشوق جرَّاحْ
ممكون باَجراحْ واَجراحْ ** والقلب لهبت أشواقَهْ
قْعَد نجعها كان مُطراحْ ** في البر كي ساحْ
بْهَز هَزْ زينات لَمْلاحْ ** عْزم لَمْ والبِلْ ساقَهْ
رحل سَل مِالقلب لفراحْ ** ورمي الْمِفتاحْ
في ليل ما فيه مصباحْ ** رحلو علي الرفاقَهْ
ناديت بالصوت براحْ ** يا الرّاحْل أرّاحْ
خلّفت في الجاش تقراحْ ** والصبر يبست أوراقَهْ
وبرّحت ما فاد تبراحْ ** والهم ما انزاحْ
الريق يا رفيق راو شاحْ ** والوقت زيّر خناقَهْ
قعد ذكرها مسك فوّاحْ ** مكحول لشباحْ
العمر في حبها راحْ ** هتف طيفها القلب شاقَهْ
اللي قلبها لودنا ماحْ ** اللي عيونها ملاحْ
اللي غثها الليل كي طاحْ ** اللي تسلبك بالحذاقَهْ
مِلْشُفتها القلب ما رتاحْ ** مِلْزولها لاحْ
ني صبحت عشاق مدّاحْ ** لغزال تقتل أرماقَهْ
ويا رب يا كريم فتاحْ ** خلاق لرواحْ
جلّي علي هـم واَتـراحْ ** ولِم شملنا بالرفاقَهْ
هني قلب من شارب الرّاحْ ** بالريم نفَّاحْ
ومازن كما صيد ميداحْ ** والناس تعرف أخلاقَهْ
مرمور مشهور يوضاحْ ** للحق وضّاحْ
لـعدوه قـتال فضّــاحْ ** كما سحاب غيمه تلاقَى
يزراق وصواعقه صحاحْ ** خـتّام صحّاحْ
بصلاة وسـلام وأمــداحْ ** عالسِّيد مولى الناقَهْ

الرواضي 1996