لُونْ ولُونْ (شعر شعبي)

صونْ قَلْبَكْ عَالخِيانَةْ صُونْ
وصونْ عينك عَالدِّنسْ لا تشوفَهْ
وإيَّاكْ لو عاهدت يوم تْخُونْ
ومن خَانْ عهْدَهْ نتيجتَهْ معروفَهْ
كونْ بالرُّجولَةْ وللرُّجولَةْ كونْ
ولا تْذِلْ تَخْضَع للزَّمنْ وظروفَهْ
وحاذر شرور النَّفِسْ يا مَضْنونْ
النَّفِسْ النِّعيلَةْ عْلَى الْهَوَى ملهوفَهْ
الدِّنيا غرورَةْ تضيِّعْ الْمَفتونْ
فعَالَمْ عجيب غرايبَهْ مصفوفَهْ
والعِشِقْ ليعَةْ جْنُون فوقْ جْنونْ
والشُّوقْ فارس والغَرامْ سيوفَهْ
قدَّاش عاقل مِالْهَوَى مجنونْ
وماذا عقُولْ من الْهَوَى مخطوفَهْ
خيِّرتْ قَلْبَكْ بين لُونْ ولُونْ
لُونْ عشق أحْمِرْ دم فوق كفوفَهْ
ولُونْ حن أبيِضْ للتي ما تهونْ
وكل الغواني خلافَهْا محذوفَهْ
ولُونْ شوق أسْوَدْ ليل غم الكونْ
ولُونْ حُلمْ وردي ذَابْ بين حروفَهْ
وما بين لُونْ ولُونْ عدِّي الهونْ
واصبُرْ عَلى كَرْبِ الْهَوَى وحتوفَهْ
ومن كان جُرحَهْ من سواد عيونْ
توفَهْ حَياتَهْ وليعتَهْ ما توفَهْ

طرابلس
‏19‏/02‏/2008‏ 02:01:01 ص