مازلت

رغم لزمان الـشر بيّ غدر
مـزّال لـحمي مر
ومـزّلت متسمّي ملك البر

**************

رغم لزمان الشر ليّ جحد
مازلت ليهم ضد
ومـازلت متسمي فكل بـلد

ومازلت رغم الضيم لي كمد
والفرح عني بعد
كما الكون متنصّب بغير عمد

ومازلت نزهر في مثيل أسد
ضرغام مـا يترد
ومــازلت شـامخ قصر ما ينهد

ومازلت كي نغضب كما المارد
من نزرتي نرعد
طوفان مـا يوقف فـشوري حد

ومازلت في وجه العواصف سد
كمـا نار ما تبرد
ومــازال عندي للغواشم رد

ومازلت نضوي شمس مـا تخمد
مهما الظلام اشتد
ومـازلت عاللعدا شقا ونكد

ومازلت لا اِحتد الـعدو نحتد
ومازلت وقت الجد
كمـا الـنمر لا نهادن ولا نرتد

ومـازال عندي للفوارس وِد
ومـازلـت نتهجد
نفزّع رجـال الـواحد الأحد

ومهما الـسما مـا نزلتش مطر
مزّال قلبي أخضر
عطشـان متحمّل لهيب الحر

**************

رغم لزمان الـشر لـيّ خذل
مازلت كلّي أمل
ومـازلت متسمّي لمن يسئل

ومـازلت شامخ في مثيل جبل
ومازلت مهما حصل
صنديد عاتي ما يطيق الذل

ومازال عندي للمصايب حل
رغم الظلام أكحل
ومازلت نرقب شمس يوم تطل

ومـازلت لا نكبكب ولا نرقل
لـو لـرض تزلزل
ومازال عندي عالبسيطة ظل

ومازلت فاَيـام الهجير جمل
مهمـا الحمل ثقل
تكتوك يرزم في عقاب البل

ومازلت مهما الوقت يتبدّل
بضيف العرب نحفل
كريم أصل زارع في الكنين نخل

ورغم القهر مازال قلبي حر
ومازلت نكمي السر
ومــازال عندي م اليقين خبر

**************

رغم لزمان الشر لي خـايـن
مـازال قلبي يحن
ومازلت راجل صرف كل زمن

ومازال عندي في القصايد ظن
ومازلت نهوى الفن
ومـازلت مـالي عالبحر سفن

ورغم لْزماني زمـان كل فتن
مازلت كلي حن
ومـازلت في رب السما نأمّن

ومازلت كي نغضب مثيل الجن
كما الغيم نتكوّن
ومـازلت ثابت بالعدو نفطن

ورغم لغريب وما لـقيت وطن
ولا صاحب ولا سكن
مازلت وقت الضيق ما نحزن

ومازلت من ليعاتها ندوّن
في قصايدي نوزن
وبـالشعر نزهى الحال يتحسّن

ورغم الكدر والدهر غدره مر
مـازلت مثل بحر
صنديد غـاضب والعيون شرر

**************

رغم لـزمـان الـشر ليّ ظلم
مازلت نكمي الهم
ومـازلت رافع عالجبل علم

ومازلت نهوى الخيل كي تنهم
وعندي عليها حكِم
ومازلت فارس في زمان أظلم

ورغم لـنسينـا ومـا بقت قيم
والوقت وقت ندم
مازلت عربي نخوتي في الدم

ومازلت قايم صرح مـا تهدّم
بركان عـالـظالم
ومـازلت نتحمّل شراب السم

ومازلت صابر كي القدر حكَم
ونـصيـغ للفاهم
هـيـلات تتلاطم بحر أدهم

ومازلت عاتي عالعدو ندهم
ومـازلت نتقدّم
نبـراس عزة ومفخرة وكرم

ورغم لْـبقيت سنين تحت ردم
لرب السما مسلّم
لا فضحـت دايـا لا نطق الـفم

ورغم التعب طال السفر في وعر
مـازلت مـا نعثر
لا نهون حلمي فـيـوم يتبعثر

**************

رغم لزمان الشر عني كذب
خـتّـال يتلوعب
مـازلت شامخ قصر متنصّب

ومازلت راضي بالذي يكتب
ومازلت كلي حب
ومازلت مثل الجن كي نغضب

ومــازلت نتحمل شقا وتعب
مهما نشوف عجب
ومازلت فارس من رجال الرب

ومازلت عاتي نزرتي ترعب
ومـازلـت نترقّب
كما النسر فوق راس الجبل نصب

ومازلت مثل الـغيم نتركّب
بصـواعقي نضرب
نهدّم بيوت لـفـكـرهم خارب

ومـازلت نطرز هيلتي نرتب
طوفـان مـاهْ يصب
ذبّـاد للأشعــار عاللي نحب

مـازن نطق الـحق وقت كتب
شريف أصل ما يكبكب
كما المزن متركّب سنين جدب

ورغم لطغي الشيطان زيفه غلب
مــازلت لـيه عطب
ومـازلت لـمريض الجواجي طب

ورغم لزمان الـشر شره نشر
مــازال شري أمر
ومــازلت نقمة منـزّله عالشر

**************

رغم لزمان الـشر بيّ غدر
مـزّال لـحمي مر
ومـزّلت متسمي ملك البر

الشرفة
8\6\2005