ماشية
< 1 دقيقة للقراءة
يا مفارقتني فها الظلام وماشية
وين ماشية
وصحة حبيبك راشية
والموت دق الباب
فليلة شقا وعذاب
وانت ماشية
بعدك احلامي ماشية
حتى القمر
بيت الشعَر
والماشية
وقصر الملك
فوق الفلك
والحاشية
لوين ماشية
وبعدك أيامي ماشية
وعز الغلا..وأشواقنا
وسر الهوى فاعماقنا
وخوف العيون الواشية
وقلبي مشي مني مشت ملامحي
والود وقت لنظلمك وتسامحي
واسرارنا…وافكارنا المتماشية
مشت ضحكتي والحزن غم ضفايفي
حتى الكلام ماشي هجر شفايفي
وعمري مشي بعدك غشتني الغاشية
لواه ماشية
وبعدك أنا ماشي فطريق نهايتي
وحكايتي
تمشي فضميري فنبض قلبي..ماشية
ونضيع ..وانت غايتي
ونموت وانت غنايتي
وتبقي فحروف وصايتي
وتمشي…وروحي ماشية
بنية صغيرة فجرّتك
شمعة فشعاع مسرّتك
قمرة تزيّن غرّتك
وتقولّك لو ماشية
خوذي العيون الدامعة
وشوق اللقا ومطامعه
وخوذي الضلوع الراشية
وخَلّي فكنيني لوْعتك
خَلّي ملامح روْعتك
وخلِّيك ديما..ماشية
العاصمة
16-09-2011 منتهى الليل