نحكيلك عن حبي

تعالي نحكيلك عن حبي
ع الجرح اللي ساكن فيّ
الاحلام اللي حلمها قلبي
وحكتها الروح لعينيّ
ـــــــــــــــــــ
تعالي نحكيلك باشواقي
عن ليعة في وسط الروح
عن قهرة فاعماق اعماقي
واوجاع القلب المجروح
تعالي نحكيلك واحكيلي
احكي وما تداري ولا تخبي
تعالي نشكيلك واشكيلي
تعالي نحكيلك عن حبي
ــــــــــــــــــ
تعالي وما تتعالي لفوق
ولا تعِلّي القلب المخلوجْ
ولا تعَلّي فجدران الشوقْ
ولا تخلّي حبيبك ممروجْ
ـــــــــــــــ
تعالي نحكيلك بحقيقة
وما نخبيش السر عليك
عن أوجاعي في كل دقيقة
وعن روحي اللي رحلت ليك
عن ليالي من الشوق طويلة
عن الليعة اللي كتبها ربي
تعالي لمحبوبك واحكيله
تعالي واحكيلي يا حبي..
ــــــــــــــــــــ
تعالي نحكيلك بسكاتي
ليذا كلامي ما يوَصلّك
عن أجمل كلمة في حياتي
من نظرة عيني تُوصلّك
ـــــــــــــــــ
خلّي كفّك فايدي خلّي
تحكيلك ع الشوق يديّ
ولو مرة تصدّي وتتخلّي
وتنسي الاحلام الوردية
نكتبلك بالدمع غناية
من قلب بالاحزان معبّي
تعالي خلـ..تكمل لحكاية..
تعالي نحكيلك عن حبي…
ــــــــــــــ
تعالي نحكيلك عن حبي
ع الجرح اللي ساكن فيّ
الاحلام اللي حلمها قلبي
وحكتها الروح لعينيّ

العاصمة
‏02‏-01‏-2012‏ 19:45:50